Mourinho er hættur að tala við leikmenn sína

Samband Jose Mourinho, þjálfara Real Madrid, og Iker Casillas, markvarðar Real, var ekki gott og það er væntanlega orðið enn verra eftir að kærasta Casillas fór að tjá sig um málefni félagsins í fjölmiðlum.

Kærasta Casillas er þekkt sjónvarpskona sem heitir Sara Carbonero. Hún hefur nú ákveðið að opna sig.

"Andrúmsloftið í búningsklefanum er ekki gott. Það er á vitorði allra að Mourinho talar ekki lengur við leikmenn sína," sagði Carbonero.

"Búningsklefinn er klofinn í augnablikinu. Við verðum að bíða og sjá hvort Mourinho lifir sumarið af og verður áfram með liðið."

Spænska blaðið Marca greindi frá því um daginn að Casillas og varnarmaðurinn Sergio Ramos hefðu hótað því að fara frá félaginu ef Mourinho yrði ekki rekinn í sumar.