Eiður og Gylfi á köntunum - Kolbeinn með fyrirliðabandið

Kolbeinn Sigþórsson ber fyrirliðaband íslenska fótboltalandsliðsins í fyrsta sinn í kvöld þegar Ísland mætir Rússlandi í vináttulandsleik á Marabella á Spáni en leikurinn hefst klukkan 19.30 og er í beinni á Stöð 2 Sport og á Boltavakt Vísis.

Lars Lagerbäck, landsliðsþjálfari, tilkynnti áðan byrjunarlið Íslands í þessum leik sem er sá fyrsti hjá liðinu á þessu ári.

Kolbeinn tekur við fyrirliðabandinu af Aroni Einari Gunnarssyni sem missir af leiknum vegna meiðsla.

Eiður Smári Guðjohnsen og Gylfi Þór Sigurðsson eru á köntunum í leiknum en inn á miðjunni eru þeir Emil Hallfreðsson og Birkir Bjarnason. Það er því sókndjörf uppstilling hjá Lars Lagerbäck í þessum leik.

Þetta er líka í fyrsta sinn sem Kolbeinn og Alfreð Finnbogason byrja saman í framlínunni síðan að Lars tók við íslenska landsliðinu.

Byrjunarlið Íslands í leiknum:

Markvörður: Hannes Þór Halldórsson

Hægri bakvörður: Birkir Már Sævarsson

Vinstri bakvörður: Ari Freyr Skúlason

Miðverðir: Hjálmar Jónsson og Ragnar Sigurðsson

Tengiliðir: Emil Hallfreðsson og Birkir Bjarnason

Hægri kantur: Eiður Smári Guðjohnsen

Vinstri kantur: Gylfi Þór Sigurðsson

Framherjar: Kolbeinn Sigþórsson, fyrirliði og Alfreð Finnbogason