Cantona dáist að Mourinho

Franska goðsögnin Eric Cantona fer fögrum orðum um portúgalska þjálfarann, Jose Mourinho, sem er í miklu uppáhaldi hjá Frakkanum.

Cantona segir að nærvera Mourinho sé helsta ástæða þess að hann fylgist með Real Madrid.

"Barcelona er eitt af fáum liðum sem heilla mig. Man. Utd er að sjálfsögðu líka eitt þeirra. Síðan er það Real Madrid því Real er með Mourinho sem þjálfara," sagði Cantona.

"Ég er ekkert sérstakur aðdáandi fótboltans sem liðin hans spila en hann er ótrúlegur karakter. Hann er eldklár, hefur mikinn sjarma og stýrir hlutunum á sérstakan hátt. Hann segir að þjálfarar þurfi að vera leikarar og ég er sammála honum.

"Hann hefur alltaf dregið að sér athyglina til þess að létta pressunni á leikmönnum sínum. Ég dáist að því hvernig hann hagar sínum málum."