NBA í nótt: 50. sigur Memphis

Memphis Grizzlies jafnaði í nótt félagsmet þegar að liðið vann góðan sigur á San Antonio Spurs í NBA-deildinni, 92-90.

Þetta er 50. sigur Memphis á tímabilinu en það er félagsmetsjöfnun. Liðið hefur þar að auki unnið tólf leiki í röð á heimavelli.

Mike Conley tryggði Memphis sigur er hann keyrði upp að körfunni og skoraði þegar að 0,6 sekúndur voru eftir. Þá komst Memphis reyndar í fyrsta sinn yfir í leiknum síðan í fyrsta leikhluta.

Conley var öflugur á lokasprettinum og skoraði fimm síðustu stig Memphis og alls 23 í leiknum. Tony Parker skoraði 25 stig fyrir San Antonio sem er enn í efsta sæti Vesturdeildarinnar. Memphis er í því fimmta.

Utah vann Portland, 112-102, og komst þar með upp fyrir LA Lakers í áttunda sæti Vesturdeildarinnar. Haldist staðan óbreytt mun Lakers ekki komast í úrslitakeppnina í vor.

Al Jefferson skoraði 24 stig og Mo Williams setti niður sex þriggja stiga körfur í leiknum fyrir Utah.

Úrslit næturinnar:

Toronto - Detroit 98-108

Atlanta - Cleveland 102-94

Milwaukee - Charlotte 131-102

Memphis - San Antonio 92-90

Houston - Orlando 111-103

Minnesota - Boston 110-100

Utah - Portland 112-102

LA Clippers - Indiana 106-109