Völler staðfestir viðræður við Chelsea

Andre Schürrle gæti verið á leiðinni til enska úrvalsdeildarliðsins Chelsea í sumar. Íþróttastjóri Bayer Leverkusen hefur staðfest viðræður félaganna.

„Já, ég var í London og við fórum yfir málin," segir Rudi Völler, íþróttastjóri Bayer Leverkusen, við þýska blaðið Bild. Hann segir þó enga ákvörðun hafa verið tekna enn sem komið er.

Talið er að félagaskiptin tengist áhuga Leverkusen á Kevin de Bruyne, leikmanni Chelsea, sem hefur staðið sig vel á leiktíðinni sem lánsmaður hjá Werder Bremen.

Chelsea hefur verið á eftir Schürrle í lengri tíma. Síðastliðið sumar hafnaði Leverkusen boði Chelsea í leikmanninn sem hafði líst yfir áhuga á að ganga í raðir þeirra bláklæddu.