Zlatan: Beckham mun vinna Meistaradeildina með PSG

Svíinn Zlatan Ibrahimovic er öruggur á tvennu - að Paris Saint-Germain vinni Meistaradeildina í fótbolta á næsta tímabili og að David Beckham verði þá enn leikmaður liðsins. Zlatan er viss um að enski miðjumaðurinn framlengi samning sinn við franska liðið.

„Við munum vinna Meistaradeildina og David mun hjálpa okkur að ná því markmiði," sagði Zlatan Ibrahimovic við Sky Sports.

„Eigendurnir vilja að hann haldi áfram með liðinu, þjálfarinn vill hafa hann áfram og við leikmennirnir viljum líka halda honum. Þess vegna er ég viss um að hann framlengi samning sinn í sumar," sagði Ibrahimovic.

„David er algjör fagmaður og er alveg eins og við hinir svekktur með að komast ekki lengra í ár. Hann trúir samt á verkefnið og þess vegna verður hann hér áfram," sagði Ibrahimovic. PSG datt út úr Meistaradeildinni fyrir Barcelona á færri mörkum skoruðum á útivelli.

„Mér fannst við gera nóg í þessum tveimur leikjum á móti Barcelona til þess að komast áfram. Það jákvæða er að Evrópa hefur séð hvað við getum gert. Við erum ekki bara ríkt félag heldur lið sem getur keppt við öll lið í Evrópu," sagði Ibrahimovic.