Verkfall lamar Lufthansa flugfélagið í dag

Þýska flugfélagið Lufthansa hefur aflýst öllum flugferðum sínum í dag. Ástæðan er verkfall hjá starfsmönnum félagsins öðrum en flugmönnum og flugáhöfnum.

Í frétt um málið hjá Bloomberg fréttaveitunni segir að um sé að ræða mestu truflanir á flugsamgöngum í Þýskalandi síðan gosið í Eyjafjallajökli lamaði allar flugsamgöngur í norðanverðri Evrópu árið 2010. Lufthansa hefur aflýst hátt í 1.800 flugferðum í dag.

Það er verkalýðsfélagið Ver.di sem stendur að verkfallinu en um 33.000 starfsmenn Lufthansa tilheyra því. Hér er m.a. um að ræða starfsmenn sem sjá um matinn um borð í flugvélunum, þá sem annast viðhald flugvélanna og þá sem vinna við fraktflutninga á vegum Lufthansa. Verkalýðsfélagið gerir kröfu um rúmlega 5% launahækkun.

Verkfallið mun aðeins ná til dagsins í dag. Hinsvegar kemur fram í fréttinni að ef ekki hafi náðst samningar í þessari launadeilu fyrir mánaðarmótin munu meðlimir Ver.di kjósa um ótímabundið verkfall í framhaldinu.