Alonso er í uppáhaldi Hamilton

Enn á ný hefur Lewis Hamilton, liðsmaður Mercedes í Formúlu 1, lýst yfir aðdáun sinni á Fernando Alonso, liðsmanni Ferrari. Þeir félagar hafa hins vegar ekki alltaf virt hvorn annan því árið 2007 sprakk McLaren-liðið í loft upp þegar Alonso og Hamilton stóðu í mega deilum.

Jafnvel þó Sebastian Vettel sé sá ökuþór sem nýtur mestrar velgengni á brautinni um þessar mundir gefur Hamilton gamla liðsfélaga sínum flest stig.

„Það er kannski skrítið en sá sem ég dái mest er Fernando, fyrir helberan hraða hans sem er nærri ótrúlegur,“ sagði Hamilton við breska dagblaðið Daily Mail. „Ég held að það komist enginn með tærnar þar sem hann hefur hælana í þessari íþrótt.“

Hamilton telur sig vera þroskaðari manneskju núna og gæti vel hugsað sér að vera liðsfélagi Alonso á ný án þess að það myndi leiða til vandræða. „Ég er eldri núna svo ég er viss um að við ættum betra samband. Mér finnst ég vera orðinn betri í að skapa sambönd við liðsfélaga en það skiptir náttúrlega máli hver það er.“

„Ef Alonso og Vettel væru til dæmis í sama liði yrði liðið í vandræðum um leið...“