NBA: New York, Indiana, OKC og Memphis komin áfram

Fjögur lið tryggðu sér sæti í 2. umferð úrslitakeppni NBA-deildarinnar í körfubolta í nótt með því að vinna sigur í sjötta leik einvíga sinna og koma þar með í veg fyrir að það yrði oddaleikur á sunnudaginn. New York Knicks, Indiana Pacers, Oklahoma City Thunder og Memphis Grizzlies unnu öll einvígi sín 4-2 og eru komin áfram.

Carmelo Anthony var með 21 stig fyrir New York Knicks sem vann 88-80 útisigur á Boston Celtics en Boston-menn voru búnir að vinna tvo leiki í röð. New York vann fyrsta leikhlutann 24-10 og komst mest 26 stigum yfir en Boston setti smá spennu í þetta með því að skora 20 stig í röð í fjórða leikhluta. Jeff Green var með 21 hjá Boston og Kevin Garnett skoraði 15 stig og tók 10 fráköst. Paul Pierce skoraði 14 stig en hitti aðeins úr 4 af 18 skotum sínum.

New York mætir Indiana Pacers í næstu umferð og er fyrsti leikurinn annað kvöld. Indiana Pacers vann 81-73 sigur á Atlanta Hawks þar sem George Hill og David West skoruðu báðir 21 stig. Roy Hibbert var með 17 stig og 11 fráköst. Atlanta átti góðan endasprett og náði að minnka muninn í þrjú stig, 76-73, þegar 2:13 mínútur voru eftir. Indiana-liðið kláraði hinsvegar leikinn og vann þar með einvígið 4-2.

Zach Randolph skoraði 23 stig fyrir Memphis Grizzlies í 118-105 sigri á Los Angeles Clippers áður en hann var rekinn út úr húsi. Clippers vann fyrstu tvo leikina en Memphis svaraði með því að vinna fjóra leiki í röð. Mike Conley var með 23 stig og 7 stoðsendingar og Tony Allen skoraði 19 stig fyrir Memphis-liðið. Matt Barnes kom með 30 stig og 10 frákast inn af bekknum hjá Clippers og Chris Paul var með 28 stig og 8 stoðsendingar.

Memphis mætir Oklahoma City Thunder sem komst áfram eftir 103-94 sigur á Houston Rockets. Rockets-liðið var búið að vinna tvo leiki í röð og minnka muninn í 3-2 en tókst ekki að tryggja sér oddaleik. Kevin Durant var með 27 stig, 8 fráköst og 6 stoðsendingar og Kevin Martin kom með 25 stig inn af bekknum. James Harden skoraði 26 stig fyrir Houston og Chandler Parsons var með 25 stig.