Gefur gamla skólanum sínum eina milljón dollara

Sama hvað mönnum finnst um LeBron James, stjörnu Miami Heat, þá verður ekki af honum tekið að hann er duglegur að gefa af sér. Sérstaklega hefur hann verið duglegur að styðja við heimabæ sinn, Akron í Ohio.

James hefur nú ákveðið að gefa gamla framhaldsskólanum sínum eina milljón dollara, eða rúmar 116 milljónir króna, svo skólinn geti gert upp íþróttaaðstöðu sína en löngu er kominn tími á umbætur.

Nýtt gólf verður lagt á íþróttasalinn, búningsklefarnir verða teknir í gegn og nýjar stúkur verða settar upp. Margt annað verður gert fyrir þennan mikla pening en aðstaðan verður glæsileg að lokum.

"Ég vil koma hlutum í verk og mun skipta mér af þessu. Skólinn og þetta verkefni skiptir mig miklu máli," sagði James.