Benitez staðfestur sem þjálfari Napoli

Það er loksins búið að staðfest að Rafa Benitez verður nýr þjálfari Napoli. Hann tekur við starfinu af Walter Mazzarri sem er farinn til Inter.

Eigandi Napoli missti það út úr sér um daginn að hann hefði samið við Benitez en komst svo að því að hann hafði ekki leyfi til að gefa það strax út. Dró hann því í land með allt saman.

Það er aftur á móti allt orðið löglegt núna enda Benitez laus allra mála hjá Chelsea þar sem hann hefur verið síðustu sex mánuði.

"Ég er mjög ánægður að hafa samið við þetta frábæra félag. Ég skil sögu félagsins og borgarinnar. Ég get ekki neitað því að ég er mjög spenntur að hefja störf fyrir félagið," sagði Benitez.

Þetta verður í annað sinn sem hann reynir fyrir sér á Ítalíu. Hann tók við Inter af Jose Mourinho á sínum tíma en var rekinn eftir stuttan tíma í starfi.