Durant á leiðinni til Jay-Z

Innkoma rapparans Jay-Z á umboðsmannamarkaðinn í Bandaríkjunum hefur vakið mikla athygli og hann er nú við það að landa ansi stórum fiski.

Ein stærsta körfuboltastjarna heimsins, Kevin Durant hjá Oklahoma, er samkvæmt fjölda heimilda vestanhafs að fara að semja við rapparann.

Durant er sagður ætla að segja skilið við þá Rob Pelinka og Landmark Sports umboðsmannafyrirtækið.

Pelinka hefur staðfest að Durant sé á förum yfir til Jay-Z en Durant sjálfur hefur ekkert látið hafa eftir sér um málið.

Hinn 24 ára gamli Durant var annar í vali á verðmætasta leikmanni NBA-deildarinnar í vetur. Hann skoraði 28,1 stig, tók 7,9 fráköst og gaf 4,6 stoðsendingar að meðaltali í leik í vetur.