Rauða Stjarnan og Standard Liege gætu komið til Íslands

Búið er að draga í aðra umferð í forkeppni Evrópudeildar UEFA og því ljóst hvaða liðum íslensku liðin mæta ef þau komast áfram í keppninni.

ÍBV mun mæta Rauðu Stjörnunni frá Serbíu ef liðinu tekst að slá HB frá Færeyjum úr keppni.

KR mætir Glentoran frá Norður-Írlandi í fyrstu umferð og fer til Belgíu og spilar við Standard Liege takist liðinu að vinna rimmuna gegn Glentoran.

Blika bíður ferðalag til Austurríkis ef liðið slær út Santa Coloma frá Andorra. Blikar drógust nefnilega gegn Sturm Graz.

Leikir annarrar umferðar fara fram um miðjan júlí.