Real Madrid þarf að borga fullt verð fyrir Illarramendi

Hinn stórefnilegi Asier Illarramendi, leikmaður Real Sociedad, er sterklega orðaður við Real Madrid þessa dagana. Hann verður þó ekki ókeypis.

Xabi Prieto, fyrirliði liðsins, er einhverra hluta vegna farinn að svara fyrir félagið og hann segir að Madrid þurfi að borga 30 milljónir evra fyrir leikmanninn. Það er sú upphæð sem þarf til þess að leysa hann undan samningi.

"Við vitum ekki hvað Illarramendi vill gera en ef Madrid greiðir fram þessa upphæð þá verður ansi erfitt að halda honum," sagði Prieto.

"Félagið segir að Madrid þurfi að greiða 30 milljónir evra og það lítur út fyrir að félagið sé til í að greiða þá upphæð."

Hinn 23 ára gamli Illarramendi er samningsbundinn Sociedad til ársins 2018.