Mikilvæg stig hjá KA

Aðeins eitt stig skilur að liðin í 2.-6. sæti 1. deildar karla en þrír leikir fóru fram í deildinni í dag.

KA blandaði sér í þennan pakka með 1-0 sigri á Fjölni en bæði lið eru nú með 21 stig í 3.-6. sæti. Haukar eru í öðru sætinu með 22 stig.

Carsten Pedersen skoraði sigurmarkið í Grafarvoginum á 87. mínútu í dag en í lok leiksins fékk þjálfari KA, Bjarni Jóhannsson, rautt hjá dómara leiksins.

Leiknir kom sér upp í sjöunda sætið með 1-0 útisigri á KF en Hilmar Árni Halldórsson skoraði eina markið í síðari hálfleik.

Þá hafði Tindastóll betur gegn Völsungi, 3-2, á Húsavík. Tindastóll er í níunda sæti með sautján stig en Völsungur er langneðstur með tvö stig.