Roma býður Maradona einkaþotu svo hann komist á völlinn

Það er sannkallaður stórleikur í ítalska boltanum á morgun þegar Roma tekur á móti Napoli í toppslag. Forráðamenn Roma hafa boðið Diego Maradona að vera heiðursgestur á leiknum.

Argentínumaðurinn er á Ítalíu þessa dagana. Maradona á að vera í Mílanó á morgun en forráðamenn Roma eru til í að útvega einkaþotu og bíl svo hann komist á leikinn en Maradona lék með Napoli á sínum tíma.

"Þetta er frábært boð hjá þeim og virðingarvert að öllu leyti. Tímaramminn er knappur og við verðum að sjá til hvort þetta sé hægt," sagði ráðgjafi Maradona við ítalska fjölmiðla.

Ráðgjafinn segir að þó svo Maradona muni ekki komast á leikinn þá kæmi það honum ekki á óvart ef goðsögnin myndi nota tækifærið síðar og fljúga til Napolí eftir leik. Þar myndi hann fá sér pítsu til að fagna sigrinum.