Lagerbäck með sama byrjunarlið þriðja leikinn í röð

Lars Lagerbäck, landsliðsþjálfari Íslands í knattspyrnu hefur tilkynnt byrjunarliðið sitt fyrir leikinn á móti Noregi sem hefst á Ullevaal-leikvanginum í Ósló klukkan 18.00. Lagerbäck teflir fram sama byrjunarliði og í sigurleikjunum á móti Kýpur og Albaníu.

Alfreð Finnbogason, markahæsti leikmaður hollensku úrvalsdeildarinnar, þarf því að sætta sig við það að byrja enn einu sinni á bekknum en fékk síðustu 24 mínúturnar á móti Kýpur á föstudaginn. Alfreð skoraði eftir að hafa komið inn á sem varamaður í fyrri leiknum á móti Norðmönnum.

Eiður Smári Guðjohnsen hafði aldrei verið í byrjunarliðinu hjá Lars Lagerbäck í keppnisleik þegar hann kom inn í byrjunarliðið fyrir Albaníuleikinn en markahæsti leikmaður Íslands frá upphafi heldur nú sæti sínu þriðja leikinn í röð.

Íslenska landsliðið er í öðru sæti riðilsins og tryggir sér með sigri sæti í umspili um laus sæti á HM í Brasilíu 2014. Íslensku strákarnir hafa náð í sjö stig út úr síðustu þremur leikjum sínum og eru á frábæru skriði eftir tvo sigurleiki í röð.



Byrjunarlið Íslands á móti Noregi í kvöld:

Markvörður:

Hannes Þór Halldórsson

Hægri bakvörður:

Birkir Már Sævarsson  

Miðverðir:

Kári Árnason og Ragnar Sigurðsson

Vinstri bakvörður:

Ari Freyr Skúlason  

Hægri kantmaður

Jóhann Berg Guðmundsson

Miðjumenn:

Aron Einar Gunnarsson (fyrirliði) og Gylfi Þór Sigurðsson

Vinstri kantmaður:

Birkir Bjarnason

Framherjar:

Eiður Smári Guðjohnsen

Kolbeinn Sigþórsson