Kristinn dæmir í Swansea og í beinni á Stöð 2 Sport

Knattspyrnudómarinn Kristinn Jakobsson verður í sviðsljósinu á fimmtudagskvöldið þegar hann mun dæma leik velska liðsins Swansea á móti Kuban Krasnodar frá Rússlandi í Evrópudeild UEFA í fótbolta. Þetta kemur fram á heimasíðu KSÍ.

Leikur Swansea og Kuban Krasnodar er í A-riðli Evrópudeildarinnar en Swansea hefur unnið báða sína leiki til þessa á meðan að Krasnodar er enn án stiga.

Leikurinn hefst klukkan 19.05 og hann verður í beinni útsendingu á Stöð 2 Sport.

Aðstoðardómarar Kristins verða þeir Sigurður Óli Þorleifsson og Áskell Þór Gíslason og fjórði dómari verður Gunnar Sverrir Gunnarsson.  Aukaaðstoðardómarar verða þeir Þóroddur Hjaltalín og Gunnar Jarl Jónsson

Þetta er annar leikurinn sem Kristinn dæmir í Evrópudeildinni á þessu tímabili en hann dæmdi einnig leik ítalska liðsins Lazio og pólska liðsins Legia Varsavia sem fór fram í Róm á Ítalíu 19. september.