Vill vita kostnað við að fylla upp í grunn Húss íslenskra fræða

Helgi Hjörvar, þingmaður Samfylkingarinnar, vill fá ða vita hvað það kostar að hætta framkvæmdum við byggingu Húss íslenskra fræða.

„Er ríkisstjórnin tilbúin til að endurskoða áform um stöðvun verksins ef Háskóli Íslands leggur fram sinn hlut í framkvæmdinni fyrr en áætlað er?“ spyr Helgi.

Hann lagði í gær fram fyrirspurn á Alþingi þar sem hann krefur Illgua Gunnarsson menntamálaráðherra svara um Hús íslenskra fræða.

Byggingin átti að húsa Stofnun Árna Magnússonar en búið er að grafa grunn hússins sem er á milli Hótels Sögu og Þjóðarbókhlöðunnar.

Helgi vill vita hver heildarkostnaður við undirbúning og framkvæmdir við húsin er nú orðin, hver sé áætlaður kostnaður við að fylla í grunn hússins og ganga frá lóðinni og hvað sé áætlað að greiða þurfi lægstbjóðanda í bætur verði ekki af verkinu.

Áætlað er að bygging hússins muni kosta rúma 3,4 milljarða króna og skiptist kostnaðurinn á milli mennta- og menningarmálaráðuneytisins og Háskóla Íslands.

Í síðustu fjárlögum var felld niður 800 milljarða króna fjárheimild til verksins.

Í fjárlögum fyrir næsta ár segir að framkvæmdin sé hluti af Fjárfestingaráætlun fyrir Ísland árin 2013-2015 en að áætlaðar tekjur sem áttu að fjármagna hana, sem sagt sérstakt veiðigjald á auðlindaarð sjávarútvegsins, söluhagnaður og eignasala hafi ekki reynst byggðar á nægilega traustum grunni.