Öruggt hjá Barcelona í bikarnum

Barcelona er komið áfram í spænska konungsbikarnum þrátt fyrir smá basl í byrjun gegn B-deildarliði Cartagena.

Heimamenn í Cartagena gerðu sér lítið fyrir og komust yfir í leiknum. Það dugði ekki til því Barcelona vann 1-4 sigur.

Pedro jafnaði leikinn og Cesc Fabregas kom Börsungum yfir rétt fyrir hlé. Pedro bætti svo sínu öðru marki við stundarfjórðungi fyrir leikslok og það var Jean Marie Dongou sem skoraði síðasta mark Barcelona á 90. mínútu.

Eins og búast mátti við hvíldi Barcelona marga af lykilmönnum sínum en það kom ekki að sök enda nóg af gæðamönnum í leikmannahópi félagsins.