Atletico Madrid upp að hlið Börsunga

Atletico Madrid fór létt með Valencia í lokaleik helgarinnar í spænsku úrvalsdeildinni. Liðið vann 3-0 sigur og er aftur upp að hlið Barcelona á toppi deildarinnar.

Diego Costa skoraði tvö mörk fyrir Atletico í kvöld, það síðara úr vítaspyrnu. Costa var þá reyndar búinn að brenna af einni vítaspyrnu en bætti upp fyrir það undir lok leiksins.

Raul Garcia skoraði einnig fyrir Atletico í kvöld en liðið er með 43 stig, fimm stigum meira en grannarnir í Real Madrid sem sitja í þriðja sætinu.

Costa hefur nú skorað sautján mörk í deildinni í vetur, rétt eins og Cristiano Ronaldo hjá Real. Báðir eru með rétt rúmlega mark að meðaltali í leik.

Úrslit dagsins:

Almeria - Espanyol 0-0

Real Sociedad - Betis 5-1

Sevilla - Athletic 1-1

Atletico - Valencia 3-0