Oklahoma með sinn áttunda sigur í röð

Aðeins tveir leikir fóru fram í NBA-deildinni í nótt. Oklahoma Thunder vann þá stórleikinn gegn Chicago Bulls nokkuð sannfærandi.

Thunder er fyrir vikið búið að vinna alla 13 heimaleiki sína í vetur. Það er metjöfnun hjá félaginu frá árinu 1976 en þá var félagið reyndar staðsett í Seattle.

Kevin Durant og Russell Westbrook skoruðu samtals 52 stig fyrir Thunder í nótt. Durant skoraði 32 stig og Westbrook 20. Þetta var áttundi sigurleikur liðsins í röð.

Joakim Noah var atkvæðamestur hjá Bulls með 23 stig og 12 fráköst.

Úrslit:

Oklahoma-Chicago  107-95

Golden State-San Antonio  102-104