Almennir kröfuhafar fá 225 milljarða

Þrotabú Landsbankans reiknar með að geta greitt 225 milljarða króna til almennra kröfuhafa sinna. Alls nema eignir búsins 1.543 milljörðum króna og forgangskröfur, að mestu hin svokallaða Icesave-skuld, eru 1.318 milljarðar króna. Áætlaðar endurheimtur búsins jukust um 170 milljarða króna í fyrra. Þetta kemur fram í nýrri samantekt á fjárhagsstöðu þrotabús Landsbankans, sem nú heitir LBI hf., en hún birt var fyrir helgi.

Búið hefur nú þegar greitt út 661 milljarð króna til forgangskröfuhafa í þremur greiðslum. Sú síðasta var innt af hendi í október 2012. Eftir á að greiða forgangskröfuhöfum, sem meðal annars eru tryggingasjóðir innstæðueigenda í Bretlandi og Hollandi, 657 milljarða króna, eða rétt tæpan helming.

Eignir þrotabúsins jukust samtals um 170 milljarða króna í fyrra. Stærstu breyturnar í þeirri þróun voru meðal annars salan á eignarhlut þess í bresku verslunarkeðjunni Iceland Foods, hækkun á kröfu á þrotabú Glitnis um 24 milljarða króna, sala á stórum hlut búsins í Eimskipi og salan á Aurum Holdings í Bretlandi.

Rekstrarkostnaður þrotabús Landsbankans lækkaði um átta prósent á milli ára og var 5,5 milljarðar króna í fyrra. Þar af voru greiddir 1,8 milljarðar króna í laun og fríðindi starfsmanna, sem var 14 prósentum lægra en árið áður. Vert er að taka fram að skilanefndir föllnu bankanna voru lagðar niður í lok árs 2011 og því var enginn kostnaður vegna þeirra í fyrra.