NBA í nótt: 48 stig hjá Durant dugðu ekki til

Tólf leikir fóru fram í NBA-deildinni í nótt en þar bar meðal annars hæst að Golden State Warriors vann sinn tíunda leik í röð.

Þá tapaði Oklahoma City, efsta lið Vesturdeildarinnar, fyrir Utah á útivelli, 112-101, þrátt fyrir magnaða frammistöðu Kevin Durant. Hann skoraði 48 stig fyrir gestina en mátti sætta sig við tap.

Gordon Hayward átti ekki síður góðan leik en hann bætti persónulegt met með því að skora 37 stig, þar af síðustu sautján stig Utah í leiknum.

Hayward nýtti þrettán af sextán skotum sínum utan af velli og var þar að auki með ellefu fráköst og sjö stoðsendingar.

Oklahoma City hafði unnið átta útileiki í röð og náði að minnka muninn í fimm stig, 99-94. En þá komu fimm körfur í röð frá Hayward sem gerði þar með út um leikinn.

San Antonio vann Memphis, 110-108, í framlengdum leik og jafnaði þar með árangur Oklahoma City. Liðin deila því efsta sæti vesturdeildarinnar.

Manu Ginobili tryggði San Antonio sigurinn með því að skora þegar 1,8 sekúnda var eftir af framlengingunni. Tim Duncan skoraði 24 stig fyrir San Antonio en Mike Conley 30 stig fyrir Memphis.

Golden State vann Milwaukee, 101-80. David Lee var með 22 stig og átján fráköst í sigri sinna manna en Golden State hefur ekki átt svo langa sigurgöngu síðan 1975.

Stephen Curry var með fimmtán stig en hitti illa - hann nýtti aðeins fimm af átján skotum sínum. Klay Thompson var einnig með fimmtán stig í leiknum.

Cleveland vann Philadelphia, 111-93, þar sem CJ Miles bætti félagsmet með því að setja niður tíu þrista í leiknum. Hann skoraði alls 34 stig og fór fyrir sínum mönnum.

Sacramento vann Portland, 123-119. DeMarcus Cousins var með 35 stig og þrettán fráköst og Rudy Gay bætti við 32 stigum.

Tvö efstu lið Austurdeildarinnar, Indiana og Miami, unnu bæði sína leiki í nótt og eru þau með væna forystu á næstu lið.

Úrslit næturinnar:

Charlotte - Washington 83-97

Cleveland - Philadelphia 111-93

Indiana - Toronto 86-79

Miami - New Orleans 107-88

New York - Detroit 89-85

Phoenix - Chicago 92-87

Memphis - San Antonio 108-110

Milwaukee - Golden State 80-101

Dallas - LA Lakers 110-97

Denver - Boston 129-98

Utah - Oklahoma City 112-101

Sacramento - Portland 123-119