AC Milan sló Hörð Björgvin og félaga út úr bikarnum

Hörður Björgvin Magnússon og félagar í Spezia eru úr leik í ítalska bikarkeppninni eftir 3-1 tap á móti AC Milan á San Siro í kvöld en þetta var fyrsti leikur AC síðan að Massimiliano Allegri var rekinn.

Mauro Tassotti stýrði liði AC Milan í þessum leik en Hollendingurinn Clarence Seedorf mun síðan taka við liðinu.

Hörður Björgvin Magnússon fékk ekkert að koma við sögu í þessum leik en hann er í láni hjá b-deildarliðinu. Nicola Ferrari minnkaði muninn fyrir Spezia í uppbótartíma leiksins.

Robinho (28.mínúta) og Giampaolo Pazzini (31. mínúta) komu AC Milan í 2-0 þegar þeir skoruðu aðeins með þriggja mínútna millibili í fyrri hálfleiknum og Keisuke Honda skoraði síðan þriðja markið í upphafi seinni hálfleiksins. Þetta var fyrsta mark Keisuke Honda fyrir AC Milan síðan að hann kom til liðsins CSKA Moskvu.

AC Milan mætir Udinese í átta liða úrslitum keppninnar en Udinese sló óvænt út Internazionale í sextán liða úrslitum.