Hafþór setti heimsmet á fyrsta degi og er efstur | Myndband

Hafþór Júlíus Björnsson er í flottum málum eftir fyrsta dag í keppninni um Sterkasti maður heims sem fer fram um helgina í Los Angeles borg í Bandaríkjunum.

Hafþór er með þriggja stiga forystu eftir þrjár fyrstu keppnisgreinarnar þar af setti íslenski víkingurinn heimsmet í einni greininni.

Hafþór sýndi í hversu frábæru formi hann er þegar hann setti heimsmet í bjórkútakasti þegar það tók Hafþór aðeins 16,35 sekúndur að henda átta þungum bjórkútum yfir rá.

Hafþór hefur þriggja stiga forskot á Litháann Zydrunas Savickas sem hefur þrisvar unnið keppnina um sterkasta mann heims. Ríkjandi heimsmeistari, Brian Shaw, er síðan í 3. sæti, fimm stigum á eftir Hafþóri.

Hafþór vann tvær greinar á fyrsta degi, hleðsluhlaup (loading race) og bjórkútakast (keg toss). Hann varð síðan annar í keppni með sirkuslóð (Circus medley).

Í dag keppir okkar maður síðan í trukkadrætti (Vehicle pull), hnébeygju (Squat lift) og loks eru það Atlas steinararnir (Atlas stones).

Hafþór hefur aldrei unnið keppnina um sterkasta mann heims en hann var í þriðja sæti í fyrra þegar Bandaríkjamaðurinn Brian Shaw bar sigur úr býtum.

Staðan eftir fyrsta keppnisdag:

1. Hafþór Júlíus Björnsson, Íslandi 35 stig

2. Zydrunas Savickas, Litháen 32 stig

3. Brian Shaw, Bandaríkjunum 30 stig

4. Michael Burke Jr, Bandaríkjunum 20 stig

5. Terry Hollands, Bretlandi 16 stig

6. Warrick Brant, Ástralíu 15 stig

7. Eddie Hall, Bretlandi 14 stig

8. Dave Ostlund, Bandaríkjunum 14 stig

9. Martin Wildauer, Ástralíu 13 stig

10. Laurence Shahlaei, Bretlandi 12 stig

11. Jean-François Caron, Kanada 11 stig

12. Jerry Pritchett, Bandaríkjunum 7 stig



Björn Þór Reynisson birti mynd af heimsmeti Hafþórs á fésbókarsíðu sinni og það má sjá tengil á það hér fyrir neðan.

Post by Björn Þór Reynisson.