Erfitt hjá AZ eftir tap gegn Benfica

Benfica vann AZ Alkmaar, 1-0, í fyrri leik liðanna í 8 liða úrslitum Evrópudeildarinnar í fótbolta og er því í fínum málum fyrir seinni leikinn í Portúgal eftir viku.

Aron Jóhannsson var í byrjunarliði AZ og fékk dauðafæri snemma leiks þegar hann slapp einn í gegn en markvörður Benfica varði skot hans meistaralega í horn.

Eduardo Salvio skoraði eina mark leiksins eftir fjórar mínútur í seinni hálfleik og um leið kom Jóhann Berg Guðmundsson inn á sem varamaður hjá hollenska liðinu.

Þrátt fyrir ágæta spilamennsku á köflum tókst heimamönnum ekki að skora og eru í erfiðum málum fyrir seinni leikinn.