Úrslitaleikur hjá Atletico og Barcelona um titilinn

Atletico Madrid hefði getað tryggt sér spænska meistaratitilinn á heimavelli gegn Malaga í dag. Liðið náði ekki að klára dæmið og þarf því að mæta Barcelona í hreinum úrslitaleik um titilinn næsta sunnudag. Lokatölur í dag 1-1 en Atletico var ekki fjarri því að tryggja sér sigur í uppbótartíma.

Leikmenn Atletico voru ekki að höndla pressuna vel framan af leik. Þeir fengu svo mark í andlitið eftir ævintýralegan klaufaskap í vörninni.

Markið kveikti aftur á móti aðeins í liðinu og Toby Alderweireld jafnaði metin með góðum skalla þegar rúmur stundarfjórðungur var eftir af leiknum.

Malaga missti mann af velli undir lokin og Atletico gerði allt sem það gat til þess að næla í mikilvægt mark. Í uppbótartíma fékk Atletico úrvalsfæri en markvörður Malaga varði með tilþrifum.

Atletico er því með þriggja stiga forskot á Börsunga og dugar jafntefli á Camp Nou til þess að tryggja sér titilinn.