Martino: Verðskulda ekki annað tækifæri

Titilvonir Barcelona fuku svo gott sem út um gluggann eftir 2-2 jafntefli gegn Getafe í gær. Börsungar náðu forystunni í tvígang, en fengu á sig jöfnunarmark í uppbótartíma.

Spjótin beinast nú að þjálfaranum Gerardo Martino sem tók við Barcelona síðasta sumar.

Argentínumaðurinn var hreinskilinn eftir leikinn gegn Getafe og sagði að hann bæri ábyrgð á vandræðum liðsins.

"Það hefur ekkert breyst. Eins og ég sagði eftir tapið (gegn Real Madrid) í úrslitaleik spænsku bikarkeppninnar og eftir að við féllum úr leik í Meistaradeildinni, þá hefur þetta ekki verið gott tímabil."

Martino taldi þó að Barcelona hefði verðskuldað sigur í leik gærdagsins.

"Það var ekki sanngjarnt að tapa stigunum með þessum hætti undir lokin. Við gerðum nóg til að vinna leikinn. Það er á ábyrgð þjálfarans, hvað gerist í varnar- eða sóknarleiknum. Hann ber ábyrgð á því," sagði Martino, en hann var einnig spurður um framtíð sína hjá Barcelona.

"Framtíð mín? Það er enn tími. Það er engin ástæða til að flýta sér. Það er enn nægur tími til að segja það sem segja þarf."

"Við höfum aldrei náð að líkjast bestu útgáfunni af Barcelona. Það er langur vegur frá."

"Það koma tímar þar sem þú uppfyllir ekki væntingarnar og ég sé ekki ástæðu til að biðja um annað tækifæri, því ég á það ekki skilið," sagði Martino að lokum, en allar líkur eru á því að Barcelona standi uppi titlalaust í fyrsta sinn frá tímabilið 2007-08.