Ísland tekur við forsæti í Norræna sundsambandinu

Hörður J. Oddfríðarson, formaður sundsambands Íslands, tók í dag við forsæti í Norræna sundsambandinu (NSF). Embættið fylgir formennsku í SSÍ og Ísland mun vera í forsæti til ársins 2018.

Hörður hefur verið í stjórn NSF frá árinu 2005. Megin markmið NSF er að styrkja og byggja upp sundíþróttir meðal þátttökuríkjanna, auka samvinnu þeirra og vera í forystu gagnvart öðru alþjóðlegu starfi í sundíþróttum.

Þing NSF er haldið í Færeyjum núna um helgina. Fyrir Íslands hönd sækja þingið ásamt Herði þau Hlín Ástþórsdóttir varaformaður SSÍ og Emil Örn Harðarson mótastjóri.

Á þinginu voru staðfest ný og uppfærð lög NSF, ásamt töluverðum breytingum á reglum þess sem varða ýmsa keppni á þess vegum. Eistland sækir nú þing NSF í fyrsta skipti sem fullgildur meðlimur sambandsins eftir að hafa verið aukameðlimur í þó nokkur ár.