Stjarnan byrjar á heimavelli

Stjarnan mætir pólska liðinu Lech Poznan á heimavelli sínum í Garðabæ á fimmtudagskvöldið í næstu viku klukkan 18.30.

FH mætir þann sama dag Elfsborg frá Svíþjóð en fyrri leikurinn fer fram ytra, í Borås, klukkan 18.00 á fimmtudagskvöld. Síðari leikurinn fer svo fram í Kaplakrika viku síðar.

Stjarnan hefur slegið út Bangor City frá Wales og skoska liðið Motherwell en Lech Poznan kom beint inn í aðra umferð forkeppninnar og vann þar Nömme Kalju frá Eistlandi, 3-1 samanlagt. Eistneska liðið sló út Fram í fyrstu umferð forkeppninnar.

Elfsborg kom einnig beint inn í aðra umferðina og sló Inter Baku úr leik eftir sigur í vítakeppni í gærkvöldi en þá mættust liðin í Aserbaídsjan.