Alfreð á skotskónum í fyrsta leik | Myndband

Alfreð Finnbogason var ekki lengi að stimpla sig inn í lið Real Sociedad en þessi mikli markahrókur skoraði fyrsta mark leiksins í 1-3 tapi Real Sociedad gegn Ajax í æfingarleik í gær.

Alfreð sem gekk til liðs við Real Sociedad fyrr í sumar var hreint út sagt óstöðvandi fyrir framan markið í hollensku deildinni og var hann ekki lengi að skora fyrsta mark sitt fyrir sitt nýja félag.

Alfreð fékk stungusendingu inn fyrir vörn Ajax og kláraði úr þröngu færi af gríðarlegri yfirvegun. Arkadiusz Milik jafnaði metin skömmu síðar fyrir Ajax en í síðari hálfleik bætti Ajax við tveimur mörkum og lauk leiknum með 3-1 sigri hollenska félagsins.

Myndbandið má sjá hér fyrir neðan en mark Alfreðs kemur eftir rúmlega mínútu.