Sveinbjörg vann þrjár greinar á innan við 90 mínútum

Sveinbjörg Zophoníasdóttir var heldur betur öflug fyrir FH-inga á fyrri degi Bikarkeppni FRÍ sem fór fram í Laugardalnum í kvöld.

Sveinbjörg náði alls í 18 stig fyrir FH með því að vinna þrjár greinar á innan við 90 mínútum.

Sveinbjörg Zophoníasdóttir vann hástökkið með því að fara yfir 1,64 metra, hún vann þrístökkið með því að stökkva 11,65 metra og tryggði sér sigur í kúluvarpinu með því að kasta kúlunni 13,61 metra.

Sveinbjörg Zophoníasdóttir er þrautarkona og því öflug á mörgum sviðum en þetta er engu að síður mjög glæsilegur árangur enda er hún að keppa í fleiri en einni grein á sama tíma.