Fótbrotnaði í sínum fyrsta NBA-leik

Það gengur fátt upp hjá Los Angeles Lakers þessi misserin og félagið varð fyrir enn einu áfallinu í nótt í tapi á móti Houston Rockets í fyrsta leik tímabilsins en vonarstjarna liðsins varð þá fyrir slæmum meiðslum í sínum fyrsta NBA-leik.

Nýliðinn Julius Randle fótbrotnaði í fjórða leikhluta í 90-108 tapi fyrir Houston Rockets en Lakers valdi hann númer sjö í nýliðavalinu í sumar.

Julius Randle er 19 ára gamall og braut sköflunginn í hægri fæti þegar hann lenti á tveimur leikmönnum Houston-liðsins undir körfu Lakers.

Randle var valinn nýliði ársins í SEC-deildinni í bandaríska háskólaboltanum á síðustu leiktíð og fór fyrir skólaliði Kentucky-háskólans sem fór alla leið í úrslitaleikinn.

Julius Randle var fluttur á sjúkrahús og eftir leikinn staðfesti þjálfarinn Byron Scott að Julius Randle væri fótbrotinn og þyrfti að fara í aðgerð.

Lakers er því búið að missa leikstjórnandann Steve Nash og nýliðann Julius Randle á stuttum tíma og þetta verður því enn erfiðara fyrir Kobe Bryant og félaga sem þykja ekki líklegir til að komast í úrslitakeppnina næsta vor.