Suárez: Messi er betri en Ronaldo

Fyrsti El Clásico-leikur vetrarins fer fram á laugardaginn þegar Real Madrid tekur á móti erkifjendum sínum í Barcelona.

Leikurinn markar lítil tímamót fyrir úrúgvæska framherjann Luis Suárez sem má hefja leik aftur eftir keppnisbannið sem hann fékk fyrir að bíta GiorgioChiellini á HM.

Suárez verður laus úr banninu aðeins nokkrum klukkustundum fyrir leik og verður væntanlega frumsýndur í El Clásico. Hann tekur fullan þátt í sálfræðistríðinu fyrir leikinn og hefur blandað sér í umræðu um hvort sé betri; LionelMessi eða CristianoRonaldo.

„Að mínu mati er Leo betri en Ronaldo. Ég æfi og spila með Leo á hverjum degi og á hverjum degi kemur hann mér á óvart. Hann er einstakur. Það vita allir hvað hann hefur gert fyrir Barcelona og að hann er heimsklassa leikmaður,“ er haft eftir Suárez í Daily Mirror.

Cristiano Ronaldo var kjörinn besti leikmaður heims fyrr á árinu eftir að Messi hafði unnið þau verðlaun fjórum sinnum í röð. Saman hafa þeir unnið gullboltann undanfarin sex skipti.

„Messi er besti leikmaður heims vegna þess sem hann hefur nú þegar afrekað þrátt fyrir ungan aldur,“ segir Luis Suárez.