Allir tóku þátt í æfingunni í dag

Allir leikmenn íslenska landsliðsins eru leikfærir fyrir leikinn gegn Tékklandi á sunnudag en allir tóku þátt í æfingu í hádeginu í dag.

Æfingin var sú síðasta í Brussel í Belgíu en landsliðshópurinn heldur yfir til Tékklands nú síðdegis. Fyrsta æfingin hér í Plzen verður svo tekin í fyrramálið en fulltrúar Vísis, sem komu yfir til Tékklans í morgun, verða vitanlega á staðnum.

Emil Hallfreðsson hefur ekki getað æft með landsliðinu af fullum krafti í vikunni vegna bakmeiðsla og hann kom ekkert við sögu er Ísland tapaði fyrir Belgíu, 3-1, í vináttulandsleik á miðvikudagskvöldið.

Sölvi Geir Ottesen hefur einnig verið að glíma við meiðsli í baki og þá er Kári Árnason með brotið bein í tá. Báðir hafa þó æft síðustu daga og verða leikfærir á sunnudag.

Leikurinn í Plzen verður á milli toppliðanna í A-riðli en bæði lið eru með fullt hús stiga eftir níu umferðir.