Verona án sigurs í síðustu sjö leikjum

Emil Hallfreðsson var á sínum stað í byrjunarliði Verona þegar liðið beið lægri hlut fyrir Sassuolo í ítölsku úrvalsdeildinni í fótbolta í dag.

Þetta var sjöundi leikur Verona án sigurs, en liðið er í 12. sæti deildarinnar með 14 stig, einu minna en Sassuolo sem er í sætinu fyrir ofan.

Vangelis Moras kom Verona yfir strax á 7. mínútu í dag og þannig var staðan í leikhléi. Sassuolo reyndist hins vegar sterkara liðið í seinni hálfleik og tryggði sér sigurinn með mörkum frá Nicola Sansone og Saphir Taïder.

Emil fór af velli á 82. mínútu, en hann fékk að líta gula spjaldið eftir hálftíma leik.