LeBron reynir enn að fá Allen til Cleveland

Cleveland Cavaliers er enn að leita að liðsstyrk og LeBron James veit hvern hann vill fá til félagsins.

James er mjög spenntur fyrir því að fá þriggja stiga skyttuna Ray Allen til félagsins en þeir léku saman hjá Miami Heat.

Allen, sem hefur skorað flestar þriggja stiga körfur í sögu NBA-deildarinnar, er búinn að leggja skóna á hilluna en LeBron reynir nú að freista hans.

Þeir ræddu saman um jólin og Allen ku enn vera að íhuga hvort hann eigi að taka slaginn með James.

Fyrr í vetur var talað um að Allen færi til Cleveland en ekkert varð af því. James neitar aftur á móti að gefast upp en hann telur Allen geta komið með það sem þarf svo Cleveland eigi möguleika að fara alla leið á leiktíðinni.