Fjórar íslenskar konur yfir þúsund stigin á Reykjavíkurleikunum

Þrjár íslenskar konur náðu mjög flottum árangri á Reykjavíkurleikunum í frjálsíþróttum um helgina en þær fengu allar yfir þúsund IAAF-stig fyrir frammistöðu sína. Þetta kemur fram á heimasíðu Frjálsíþróttasambands Íslands.

Íslenskar konur voru í efstu tveimur sætunum yfir bestan árangri í öllum greinunum, Aníta Hinriksdóttir var efst fyrir 800 metra hlaup sitt og nýtt íslenskt met Hafdísar Sigurðardóttur í langstökki kom henni upp í annað sætið.

Aníta Hinriksdóttir úr ÍR náði besta árangri allra keppenda mótsins en hún fékk 1103 stig fyrir að hlaupa 800 metra hlaupið á 2:02,88 mínútum. Aníta leiddi hlaupið frá upphafi og gaf keppinautum sínum lítinn möguleika á að fylgja sér eftir.

Hafdís Sigurðardóttir stökk 6,47 metra í langstökki sem gaf henni 1089 stig en í öðru sæti var Þjóðverjinn Nathalie Buschung með stökk upp á 6,18 metra sem skilaði henni 1026 stigum.

Þriðja íslenska konan sem komst yfir þúsund stigin var hin fjórtán ára gamla Þórdís Eva Steinsdóttir sem fékk 1000 IAAF-stig fyrir að hlaupa 600 metra hlaup á 1:32,25 mínútum sem var nýtt aldursflokkamet hjá 15 ára stúlkum. Þórdís Eva bætti þar met Anítu Hinriksdóttur.

Fjórða íslenska konan til að ná þúsund stiga grein var Hrafnhild Eir Hermóðsdóttir úr ÍR sem sigraði í 60 metra hlaupi kvenna en hún kom í mark á 7,64 sekúndum.

Tveir íslenskir karlar náðu einnig yfir þúsund stigin,  Einar Daði Lárusson fékk 1040 stig fyrir að hlaupa 60 metra grindarhlaup á 8,10 sekúndum og Óðinn Björn Þorsteinsson fékk 1015 stig fyrir að kasta kúlunni 18,22 metra.

Bestu afrek mótsins voru þessi:

 

IAAF-Stig      Nafn                                   Fæð.ár        Félag          Árangur          Grein

1103         Aníta Hinriksdóttir                 1996              ÍR         2:02,88    800 metra hlaup

1089         Hafdís Sigurðardóttir            1987              UFA     6,47         Langstökk

1061         Victoria Sauleda                   1992              Spánn      2:05,29    800 metra hlaup

1061         Daniel Gardiner                    1990              Bretland     7,69         Langstökk

1040         Einar Daði Lárusson             1990              ÍR         8,10         60 metra grindahlaup

1026         Nathalie Buschung               1996              Þýskaland     6,18         Langstökk

1015         Óðinn Björn Þorsteinsson     1981              ÍR         18,22       Kúluvarp

1003         Þórdís Eva Steinsdóttir         2000              FH       1:32,25    600 metra hlaup