Fjöldi ferðamanna í janúar álíka og á háannatíma árið 2006

Fjöldi ferðamanna á Íslandi í janúar síðastliðnum var álíka og á háannatíma, í júlí og ágúst árið 2006 og árin þar á undan. Erlendir ferðamenn voru 62,8 þúsund í janúar samanborið við 46,7 þúsund á sama tíma í fyrra samkvæmt tölum frá Ferðamálastofu Íslands um brottfarir erlendra ferðamanna frá landinu um Keflavíkurflugvöll. Jafngildir þetta 35% fjölgun á milli ára. Þetta kemur fram í morgunkorni greiningardeildar Íslandsbanka.



Þá telur greiningardeildin vísbendingar um að ekkert lát verði á fjölgun erlendra ferðamanna hingað til lands í ár. Vöxturinn á þessu ári gæti numið á þriðja tug prósenta. „Miðað við þá spá má áætla að ferðaþjónustan muni skila okkur 342 milljörðum króna í gjaldeyri í ár, sem er um tæpur þriðjungur af þeim 1.200 milljörðum króna sem við reiknum með að heildartekjur vegna vöru- og þjónustuviðskipta við útlönd verði á árinu,“ segir í greiningu Íslandsbanka.

Ferðaþjónustan stærsta útflutningsgreinin

Ferðaþjónustan er orðin stærsta útflutningsgreinin samkvæmt greiningunni. Íslandsbanki áætlar að útflutningstekjur ferðþjónustu hafi numið 308 milljörðum króna árið 2014 en endanlegar tölur fyrir árið liggja ekki fyrir. Inni í þeirri áætlun eru einnig tekjur íslenskra flugfélaga af því að flytja erlenda farþega, hvort sem það er til og frá Íslandi eða annars staðar í heiminum. Miðað við þetta mat greiningardeildarinnar voru útflutningstekjur þjóðarbúsins vegna ferðaþjónustu 28% umfram útflutningstekjur sjávarútvegsins í fyrra, og 43% umfram tekjur af áliðnaði.

Kortavelta útlendinga hér á landi var rúmlega 7,3 milljarðar króna í janúar, sem er aukning upp á rúm 29% frá sama tímabili í fyrra. Kortavelta Íslendinga í útlöndum nam alls 6,4 milljörðum króna. Því var mismunur á kortaveltu útlendinga hér á landi og veltu Íslendinga erlendis, jákvæður um 932 milljónir króna. Það er langhagfelldustu útkoma þessa jafnaðar frá upphafi í janúarmánuði. Jöfnuður kortaveltu hefur einungis einu sinni mælst jákvæður áður.