Vodafone og önnur símafyrirtæki högnuðust um 12 milljónir á Eurovision

Metþátttaka var í símakosningu í Söngvakeppni Sjónvarpsins um helgina þegar áhorfendur greiddu tæplega 170 þúsund atkvæði í gegnum símakosningu.

„Ætli það hafi ekki mest með það að gera hversu tæpt þetta stóð. Það var mikil spenna,“ segir Skarphéðinn Guðmundsson dagskrárstjóri innlendrar dagskrárgerðar hjá RÚV ohf. Gamla metið var um 140 þúsund atkvæði en hafa undanfarin ár verið á milli 80 og 100 þúsund.

Sjá einnig: María vann með 15.000 atkvæða mun.

Hver um sig gat greitt eins mörg atkvæði og sá gat komið að á þeim tíma sem kosningin stóð yfir og eftir að fyrir lá hvaða tvö efstu lög voru efst, var kosningin endurtekin á þá á milli þeirra tveggja. Vísir hefur heimildir fyrir því að einn einstaklingur hafi greitt 100 atkvæði, sem þýðir að hann hefur greitt fyrir það 13 þúsund krónur. Sjálfsagt eru fleiri dæmi um slíka ákefð. Þá liggur fyrir að gamlir nemendur Verzlunarskólans létu mjög til sín taka í keppninni, tvö efstu lögin eiga ætt og uppruna að rekja þangað og víst er að vel heppnuð markaðssetning kom við sögu.

Skarphéðinn segir það ekki þurfa að koma á óvart að Verzlunarskólanemar mæti sterkir til leiks: „Skólinn heldur stóra söngvakeppni sem heitir Verzló-vælið og svo hafa þau sett um mjög metnaðarfulla söngleiki í tengslum við nemendamótið. Þetta hefur vaxið mikið. Virðist sem þarna séu æfingabúðir fyrir hæfileikafólk á þessu sviði og virðist vera að skila sér með þessum hætti.“

Hvert atkvæði kostaði áhorfendur 129 krónur þannig að heildartekjur af þeim 168.762 atkvæðum sem voru greidd nema um 21,7 milljónum króna. Skarphéðinn segir tekjuhluta Ríkisútvarpsins af símakosningunni áætlaðan 9 milljónir króna og segir hann renna beint upp í kostnað við framleiðslu Söngvakeppninnar sem liggur ekki endanlega fyrir en er áætlaður ríflega 30 milljónir króna. RÚV situr sem sagt ekki eitt um hituna, símafyrirtækin taka sinn skerf.

„Þess vegna segjum við tekjuhluti RÚV, því þetta skiptist milli okkar og símafyrirtækja. Og svo er náttúrlega VSK-urinn. Vodafone sá um þetta fyrir okkur og svo rennur hluti hagnaðar til annarra fyrirtækja, þá þar sem þeir sem greiddu atkvæði eru í viðskiptum,“ segir Skarphéðinn.