Starfsmenn neita að fljúga

Hætt hefur verið við fjölda flugferða með Germanwings þar sem að starfsmenn flugfélagsins hafa neitað að fljúga. Óttast starfsfólkið að hrap vélar Germanwings í Frakklandi í morgun tengist viðhaldsvinnu á vélinni frá því á mánudag, samkvæmt heimildum Spiegel.

Talsmaður flugfélagsins segir að áhafnarmeðlimir neiti að fljúga af „persónulegum ástæðum“.

Flugfélagið hefur staðfest að vélin sem hrapaði í morgun var kyrrsett í um klukkustund á mánudag vegna viðhalds en því er haldið fram að bilunin hafi ekki haft með öryggi vélarinnar að gera. „Viðgerðin var eingöngu til að laga hljóð sem hurð framkallaði,“ segir talsmaðurinn.