Phelps vann fyrsta sundið eftir bannið

Michael Phelps snéri aftur í sundlaugina í gær og gerði það með stæl.

Phelps er nýbúinn að afplána sex mánaða bann sem hann fékk fyrir að vera handtekinn drukkinn undir stýri.

Phelps kom fyrstur í mark í 100 metra flugsundi á 52,38 sekúndum og var á undan landa sínum, Ryan Lochte, sem kom í mark á 53,11 sekúndum.

Góður sigur hjá Phelps þó tíminn sé ekki einn af tíu bestu á árinu. „Þetta er eitthvað til að byggja á," sagði Phelps léttur eftir sundið.

Phelps hefur frekar óvænt sett stefnuna á ÓL í Ríó á næsta ári. Hann er sigursælasti keppandi í sögu Ólympíuleikanna með 22 verðlaun.

Hann mun ekki fá að synda á HM í Rússlandi í ágúst þó svo hann sé augljóslega orðinn nógu góður til þess.