Volkswagen Golf GTE Sport í Wörthersee

Volkswagen Golf bílar eru einir algengustu bílar heims, en það verður ekki sagt um hann þennan. Þessi Golf er tilraunaverkefni sem Volkswagen ætlar að sýna á hinni árlegu tilraunabílasýningu Volkswagen Group bíla sem haldin er við vatnið Wörthersee í Austurríki.

Volkswagen Golf GTE Sport er 395 hestafla ofurkerra og tvíorkubíll. Hann er bæði með öflugan brunamótor og rafmótora og er aðeins 4,3 sekúndur í 100 km hraða og með hámarkshraðann 280 km/klst.

Ytra útlit bílsins er nú nógu framúrstefnulegt en það á ef til vill enn frekar við innra útlit hans. Þar er líkt og kíkt sé inní framtíðina og ef til vill sér Volkswagen fyrir sér svona útlit í framtíðarbílum sínum. Mikið er notað af koltrefjum í bílinn, einnig að innan.

Bíllinn er líklega ekki mjög notadrjúgur, en hann er aðeins teggja sæta og athygli vekur hár millistokkur sem er á milli framsætanna. Þetta fyrirkomulag er ekki líklegt að sjá í bílum Volkswagen í framtíðinni, en samt gæti eitthvað úr þessum tilraunabíl ratað í bílgerðir Volkswagen í framtíðinni. Það verður ekki tekið af þessum bíl að hann er ógnarfallegur.