Þolinmæði kjúklingaræktenda þrotin

Tveir kjúklingaframleiðendur dreifa nú kjúklingakjöti í stórmarkaði þrátt fyrir samkomulag sem hefur gilt á milli þeirra og dýralækna. Framleiðendur segja að rekstrargrundvöllur framleiðslunnar muni bresta verði ekkert selt af kjötinu og sá tími sé runninn upp.

Samkomulagið ekki lengur í gildi

Í verkfalli dýralækna hafa kjúklingabændur fengið undanþágu fyrir slátrun en samningur milli bænda og dýralæknafélagins var gerður um undanþágur gegn því skilyrði að kjötið yrði sett í frost og ekki selt. Bændur telja nú að samkomulagið sé ekki lengur í gildi.

Kjöt frá Matfugl og Reykjagarði, tveimur af þremur ræktendum, má nú finna í stórmörkuðum en þessi fyrirtæki hafna nú því samkomulagi sem gert var við dýralækna. Matthías Hannes Guðmundsson, framkvæmdastjóri hjá Reykjagarði sem framleiðir Holta kjúkling, segir að steininn hafi tekið úr þegar undanþágunefnd dýralækna neitaði í gær að leyfa slátrun og sölu kjötsins. Hann segir að dýralæknar hefðu gefið til kynna að þeir myndu verða sveigjanlegri en þau fyrirheit hafi að engu orðið. 

Þolinmæðin þrotin

„Okkar þolinmæði var bara þrotin. Við erum búin að vera bundin með kjötbirgðir nú á fjórðu viku, rekstrarféð er uppurið, við höfum lítið sem ekkert fjármagn til að reka fyrirtækið og það gengur bara ekki lengur.“

Aðspurður hvort kjúklingabændur séu að ganga á bak orða sinna gagnvart því samkomulagi sem var við dýralækna, segir Matthías ekki svo vera.

„Nei, það hefur verið ýjað að því að leysa málin á ákveðinn hátt, að leyfa einhverjum að slátra, sem Dýralæknafélagið stóð ekki við,“ sagði Matthías í fréttum Stöðvar tvö í kvöld. „Það var ákveðið útlegg sem þeir lögðu fram um að við myndum halda áfram að slátra og frysta kjötið en taka út á móti tvöfalt magn úr frosti, þýða það og dreifa því. Það var það sem þeir sjálfir lögðu til, svona á milli manna án þess að neitt skriflegt sé til um það.“

Vilja athuga með bætur

Svína- og alifuglafyrirtæki hafa sent Samkeppniseftirlitinu erindi vegna þeirra skilyrða sem dýralæknar settu og vilja að athugað verði hvort samkeppnislög hafði verið brotin. Einnig skoða fyrirtækin nú hvort sækja megi bætur fyrir það tjón sem orðið hafi „með þessum ólögmætu þvinguðu skilyrðum“ eins og stendur í yfirlýsingunni. 

Nógu löng „þrautarganga“

„Það verður bara að reyna að leysa þetta viðfangsefni og leyfa okkur að slátra. Við erum þegar búnir að ganga þrautargönguna nógu lengi,“ bætti Matthías við.

Ekki náðist í talsmann dýralækna eða formann Dýralæknafélagsins í dag.