Íslandsbanki jafnvel seldur í næstu viku

Sala á Íslandsbanka gæti átt sér stað í næstu viku en í viljayfirlýsingu sem stærstu kröfuhafar Glitnis hafa undirritað og sent stjórnvöldum kemur fram að bankinn verði seldur fyrir árslok 2016. Kjarninn segist hafa heimildir fyrir því að erlendir fjárfestar í Íslandsbanka verði kynntir til leiks í næstu viku.

Sjá einnig: Íslandsbanki og Arion banki verði seldir fyrir árslok 2016



Íslandsbanki er að stærstum hluta í eigu slitabús Glitnis en ríkið á fimm prósenta hlut. Í samkomulaginu sem kröfuhafarnir hafa sent stjórnvöldum í tengslum við áætlun stjórnvalda um afnám fjármagnshafta sem kynnt var almenningi í gær kemur fram hvernig sölutekjum verði skipt á milli kröfuhafanna og stjórnvalda.



Verði Íslandsbanki seldur til erlendra aðila skal 60 prósent söluandvirðis renna til stjórnvalda í erlendri mynt, en þó ekki meira en sem nemur 60 prósent af bókfærðu virði bankans miðað við skráð evru 5. júní 2015.

Sjá einnig: Stærstu kröfuhafarnir hafa lýst yfir vilja til að fara eftir skilyrðum



Kjarninn segir að samkvæmt síðasta birta fjárhagsuppgjöri Glitnis sé heildarvirði bankans metið á um 180 milljarða króna. Miðað við það fær íslenska ríkið 108 milljarða króna í erlendum gjaldeyri, verði bankinn seldur fyrir bókfært virði.



Til viðbótar er kveðið á um í samkomulaginu, sem þó hefur ekki verið staðfest af slitabúunum sjálfum, að allt eigið fé Íslandsbanka umfram 23 prósent skuli renna til íslenskra stjórnvalda. Það myndi skila um 8,7 milljörðum króna til viðbótar í ríkiskassann.