Real Madrid staðfestir ráðningu Benitez

Real Madrid staðfesti í morgun að félagið hafi gert þriggja ára samning við Rafael Benitez, sem síðast var stjóri Napoli á Ítalíu.

Benitez tekur við starfinu af Ítalanum Carlo Ancelotti, sem var látinn fara eftir tímabilið sem nú er nýlokið.

Real Madrid birti stutta tilkynningu á heimasíðu sinni í morgun en Benitez verður kynntur fyrir fjölmiðlum á blaðamannafundi í hádeginu í dag.

Benitez hóf þjálfaraferil sinn hjá Real Madrid en hann er fæddur og uppalinn í borginni. Hans fyrsta starf sem aðalþjálfari var hjá Valadolid en hann sló í gegn sem þjálfari Valencia í upphafi síðasta áratugar og var síðar ráðinn til Liverpool.

Benitez hefur einnig þjálfað hjá Inter, Chelsea og nú síðast hjá Napoli, sem fyrr segir.