Aníta auðveldlega í úrslit

Aníta Hinriksdóttir kom fyrst í mark í þriðja riðli undanrása 800 metra hlaups kvenna á Evrópumóti 19 ára og yngri sem nú stendur yfir í Eskilstuna í Svíþjóð.

Hún náði besta tímanum af öllum sem hlupu í undanrásunum og komst auðveldlega í úrslitahlaupið sem fram fer á laugardaginn klukkan 15.15.

Aníta tók forystuna eftir 200 metra og stakk keppinauta sína af. Hún kláraði fyrri hringinn á 1:00,64 mínútum og kom í mark á 2:05,01 mínútum.

Þjóðverjinn Mareen Kalis varð önnur í þriðja undanriðli á 2:05,47 mínútum og Ítalinn Irene Vian varð þriðja á 2:07,55 mínútum.

Aníta er ríkjandi Evrópumeistari eftir sigur á mótinu fyrir tveimur árum. Hún á besta tíma allra keppenda og þann besta á þessu ári.

Belginn Renée Eykens kom fyrst í mark í fyrsta riðli, en hún hljóp á 2:06,31 mínútum. Eykens hafði betur gegn Anítu á Junior Gala-mótinu í Mannheim á dögunum.

Molly Long frá Bretlandi varð í öðru sæti í fyrsta riðli, en hún kom í mark á tímanum 2:06,87. Portúgalinn Salomé Afonso varð þriðja á 2:07,72.

Þjóðverjinn Sarah Schmidt vann riðil tvö er hún kom í mark á 2:05,85 mínútum og í öðru sæti varð Mhairi Hendry frá Bretlandi á 2:06,21 mínútu. Corane Gazeau frá Frakklandi varð þriðja á 2:07,15 mínútum.

Smelltu hér til að sjá beina útsendingu frá keppninni.