Hafdís setti nýtt Íslandsmet í langstökki

Hafdís Sigurðardóttir, UFA, setti í dag nýtt Íslandsmet í langstökki á Unglingalandsmóti UMFÍ á Akureyri.

Hafdís stökk 6,56 metra en hún átti gamla metið sem var 6,45 metrar. Hún setti það einnig á Akureyri, á vormóti UFA í maí á þessu ári.

Lágmarkið fyrir heimsmeistaramótið í Peking í Kína síðar í mánuðinum er 6,70 metrar. Hafdís verður að ná því fyrir 10. ágúst. Þessi sama lengd er líka lágmarkið fyrir Ólympíuleikana í Ríó á næsta ári.

„Ég fann það í fyrsta stökki og þetta gæti gerst. Þetta met gefur mér vonandi byr í seglin að ná lágmörkum fyrir HM í Peking. Ég er að fá boð um að keppa á mótum erlendis en get ekki þegið þau vegna peningaskorts. Því miður er staðan þessi en við verðum að vona það besta,“ sagði Hafdís í samtali við heimasíðu UMFÍ eftir metstökkið í dag.