Vill að Garðabær taki á móti flóttafjölskyldum

Bæjarfulltrúi Bjartar framtíðar í Garðabæ hefur lagt fram tillögu þess efnis að bærinn veiti flóttamönnum viðtöku. Tillagan var lögð fram á fundi bæjarráðs í gær og „lýsir bæjarráð yfir áhuga á málinu og felur bæjarstjóra að ræða við félagsmálaráherra um hugsanlegan stuðning bæjarins við móttöku flóttamanna“. Þetta kemur fram í fundargerð bæjarráðs.

„Líkt og svo mörgu öðru í bæjarráði var tillögunni vísað áfram til bæjarstjóra sem ákveður á eigin forsendum hvað hann gerir,“ segir Guðrún Elín Herbertsdóttir. Guðrún er varamaður í bæjarráði en sat fundinn í gær í stað Halldórs Jörgenssonar og hún lagði málið til. „Tillagan fékk ágætis hljómgrunn í ráðinu en svo sjáum við hvað setur.“

Að sögn Guðrúnar er málið enn á frumstigi og ekki hægt að fullyrða um hverjar niðurstöðurnar verði úr samræðum við félagsmálaráðuneytið og nærliggjandi sveitafélög. Verði niðurstöður viðræðnanna jákvæðar gæti Garðabær orðið annað sveitarfélagið sem lýsir því yfir að það vilji taka á móti flóttamönnum en það gerði Akureyrarbær í síðustu viku.

„Vonandi fer þetta sem fyrst í vinnslu og við í Bjartri framtíð munum ýta á eftir því,“ segir Guðrún og bætir við að í gegnum tíðina hafi stemningin í Garðabæ svolítið verið á þann veg að þeim sem minna mega sín hafi verið vísað annað. Máli sínu til stuðnings bendir hún á að félagslegu íbúðir bæjarfélagsins eru staðsettar á Reykjanesinu. „En það er vonandi að það sé að verða breyting á því.“

Í síðasta mánuði tilkynnti ríkisstjórnin að Ísland myndi taka á móti fimmtíu flóttamönnum til að létta á miklum straumi flóttamanna til Grikklands og Ítalíu. Fjölskyldurnar sem koma til landsins eru frá Sýrlandi, Eritreu, Írak og Sómalíu.

Rúmlega 283.000 flóttamenn komu til ríkja Evrópusambandsins í fyrra. Stærstur hluti þeirra kom frá löndum í Norður-Afríku og Miðausturlöndum.

„Stjórnvöld hafa einhverja formúlu á bak við þetta þannig mig grunar að talan fimmtíu sé ekki út í loftið,“ segir Guðrún. Aðspurð um hver stóran hluta flóttamannanna hún myndi vilja sjá koma í Garðabæ segir hún að „það fari auðvitað eftir kostnaði en um fimm fjölskyldur ætti að geta gengið.“

Gunnar Einarsson, bæjarstjóri Garðabæjar, vill koma því á framfæri að það sé þvaður að Garðabær eigi félagslegar íbúðir staðsettar á Reykjanesi og honum þyki dapurlegt að bæjarfulltrúi haldi slíku fram. Einnig sé firra að bærinn vísi þeim sem minna mega sín annað. 

Hvað tillöguna sjálfar varðar þá átti hann fund með félagsmálaráðherra í dag vegna annars máls og nefndi komu flóttafólksins í lok fundarins. Málið sé á algjöru frumstigi.